DILI: Radiu no Televizaun Universidade Oriental Timor Lorosa’e (RTVU-O), 02 Outubru 2026. Departamentu Formasaun Espiritual UNITAL kontinua Realiza Misa Primeira Sexta iha fulan Outobru tinan 2026, hodi nafatin hametin fiar katak Maromak mak sempre akompaña ita-nia moris.
Iha Misa Primeira Sexta ne’e, Amu Selebrante Ahrjay Y. Dafun, liuhusi nia omilia, hateten katak Maromak hakarak lori ita ba dalan ne’ebé naroman ba aban-bainrua. Hanesan estudante sira bainhira remata ona graduasaun no hetan servisu, dala ruma hasoru dezafiu ka difikuldades, maibé Maromak nafatin akompaña liuhusi inan-aman no família ne’ebé sai nu’udar instrumentu maromak nian hodi fó enkorajamentu no guia ita iha dalan ne’ebé loos.
Tamba ne’e, Amu selebrante konvida nafatin fiar-na’in sira atu mantén fiar no nanoin katak Nai Maromak sempre la’o hamutuk ho ita iha situasaun hotu. Nia mós husu atu ema ida-idak lori an hodi muda buat ne’ebé presisa muda no moris tuir Maromak nia dalan loloos.
Nain akompaña hau, no lori hau ba dalan ne’ebé los, ne’e mak liafuan orasaun ne’ebé bele sai gia no inspirasaun ba ema hotu bainhira hasoru situasaun ne’ebé difisil.
Jornalista : Venceslau Gusmão
Editora : Augustina Bosco
Leave a Reply