DILI, 28 Outubru 2025 (RTVU), Estudantes estajiu servisu sosiál, Universidade Oriental Timor-Lorosa’e (UNITAL), hamutuk (27) hala’o despedida ho komunidade Suku Aubeon Postu Administrativu Barique, Munisipiu Manatutu molok estudantes sira fila fali ba iha Universidade.
Reitor UNITAL, senti kontenti no orgullu tebes tanba Serimónia Despedida ohin loron nian ne’e iha ambiente ne’ebé diferente no espsiál kompara ho serimónia sira seluk, hakarak hato’o agradesimentu boot no kle’an tebes ba Xefe Suku, Xefe Aldeia sira, no liu liu ba povu tomak Suku Aubeon nian, Ita-boot sira simu ami-nia estudante sira ho laran luak no fó fatin ba sira atu hamutuk durante fulan ida nia laran, ami-nia universidade (UNITAL) haruka ami-nia estudante sira mai iha ne’e ho objetivu ne’ebé klaru, no ami hili suku tolu de’it mak sai fatin hodi sira bele realize sira-nia Estajiu Servisu Sosiál (ESS), Suku Aubeon sai nu’udar fatin referénsia ne’ebé fó esperiénsia prátika ne’ebé la bele haluha ba ami-nia estudante sira.” Claudino Ninas Nabais relata bajornalista iha Suku Aubeon.
Ohin loron ne’e, ami-nia Suku Aubeon hotu hamutuk ho estudante sira hodi selebra enseramentu ba Estajiu Servisu Sosiál (ESS) tinan letivu 2025 husi Universidade Oriental Timor Lorosa’e (UNITAL). HanesanXefe Suku, ha’u senti apresia no fó parabéns boot ba estudante sira hotu, tanba sira mai ho vontade rasik, ho pensamentu ne’ebé luan no ho kreatividade rasik. Ami hare’e katak estudante sira ne’e serbisu kapas lo’os tanba sira lori sira-nia matenek akadémiku mai ne’ebé tulun duni ami-nia komunidade Servisu hamutuk ne’e nu’udar pasu importante ida hodi kesi amizade ne’ebé metin entre estudante sira ho ami-nia komunidade, liuliu ho Universidade UNITAL.Tanba ne’e, ami husu ba universidade UNITAL, ba tinan oin mai, keta haluha Suku Aubeon, tanba ami-nia odamatan sei nakloke nafatin atu simu estudante sira hodi mai hala’o sira-nia estajiu servisu social iha fatin ne’e.”hateten Domingos Rosaga, ba jornalista iha nia kna’ar fatin Suku Aubeon.
Estudante estajiadu Patricio Ximenes, kalan ne’e, ami estudante sira hato’o ba komunidade Suku Aubeon katak ami-nia Estajiu Servisu Sosiál (ESS) tinan letivu 2025 iha ne’e atinje ona nia enseramentu. Serimónia enseramentu ne’e marka ami-nia tempu atu fila fali ba universidade hodi kontinua ami-nia estudu. Ami hakarak hato’o agradesimentu espesial tanba atividade despedida ne’e hetan apoiu total husi komunidade Aubeon rasik, no mós apoiu ne’ebé forte husi ami-nia kolega jovens jogadores sira. Durante fulan ida nia laran, planu atividade ne’ebé ami konsege implementa iha Suku Aubeon mak inklui: hamos fatin (lixu) sira, kria no hadi’a jardín, halo lutu haleu sentru klínika, hadi’a no pinta Bandeira Rín (bandeira nia ai-rin), no kuda nu’u iha tasi ibun.” Nia hateten.
Tuir jornalista Nia observasaun iha atividade enseramentu ne’e, katak estudante no komunidade iha ligasaun ne’ebé metin tebes. Hanesan sinál ida husi apresiasaun komunidade Suku Aubeon hatudu sira-nia inisiativa rasik hodi fó prémiu especial ida ba estudante estajiu sira. Prémiu ne’e la’ós de’it valor material nian maibe hanesan símbolu husi sentiment ba malu ho mensajen ne’ebé lori esperansa katak, bainhira sira fila fali ba universidade estudante sira keta haluha Suku Aubeon no amizade ne’ebé hari’i ona inisiativa komunitáriu ne’e hatudu sasin kona-ba susesu husi Estajiu Servisu Sosiál UNITAL hodi hari’i ligasaun no kooperasaun ne’ebé forte iha terrenu
Jornalista : Edison Fernandes
Editora :Revelina Rangel
Leave a Reply