UNITAL, 27 Outubru 2025 (RTVU), Presidenti Fundasaun Oriental Timor-Lorosa’e (FORTIL), Segunda-Feira ne’e, partisipa selebrasaun aniversariu ba dala (23), husu Universidade no estudantes atu hametin paz no estabilidade iha Universidade Oriental Timor-Lorosa’e (UNITAL) hafoin lansa ofisialmente ba internet starlink husi kompania Vorakai.
Ohin Universidade Oriental Timor-Lorosa’e halo ba tinan 23, UNITAL ami mak na’in, ami lahatene kona-ba kestões akademiku, maibé ami hare’e liu ba oan sira ne’ebé ke grau akademiku a’as, ami iha Ai-Laran mós lahanoin atu sai na’in ba Universidade ida ka na’in ba Fundasaun, maibé ami hare’e ba soldadu sira ne’ebé ami komanda mesak analfabetu, Timor-Leste ukun a’an ho analfabetu ita lala’o ba oin, razaun ida ne’e maka ami na’in (4) hamutuk mai hari’i Universidade ida ne’e, ne’ebé ohin loron halo ba tinan (23), tanba ne’e mak hau nia parabéns ba maluk sira ne’ebé mak durante ne’e la’o hamutuk ho ami iha tinan naruk nia laran mai to’o ohin loron, imi iha interese estadu nasaun nian tanba ne’e imi metin to’o agora, hametin paz no estabilidade iha Universidade Oriental Timor-Lorosa’e (UNITAL) ne’e fator determinante kualker prosesu nia laran, laiha estabilidade ita labele halo buat ida,” Lere Anan Timur hateten iha UNITAL Bekora Dili.
Foin dadauk hau nia intelektuais balun lori b alia kona-ba politika, hau hatene saida mak hau ko’alia, hau la’os dehan katak, labele hatene politika iha Universidade, tanba Universidade fatin siénsia atu aprende politika ekonomia, politika sosiál, politika kultural, buat hotu-hotu halo parte ba vida Nasaun ne’e nian, se nia katak hametin paz no estabilidade presiza hatene universidade ne’e atu halo saida, Universidade atu prepara ema sai ema atu sai servidor di’ak ba ita nia Nasaun foun, baibain ita dehan katak, ita nia Nasaun hari’i ho Ran ho Isin,” nia hatutan.
Entaun hau nia mensajen mak ne’e, labele halo politika iha Universidade nia laran, tanba ohin loronm ita hare’e, tantu iha governu iha ne’ebé-ne’ebé de’it, mak hakarak politiza instituisaun politiza organizasaun, tanba ne’e hau nia mensajen ba Universidade Oriental Timor-lorosa’e (UNITAL), nu’udar fundadores iha ne’e atu aprende siénsia, laiha partidu A ka B iha ne’e ita mesak timor oan se ema ruma husi rai liur hakarak mai eskola iha ne’e simu de’it, iha ne’e ita lahare ba kor no relijiaun.
Entertanto remata iha iha semonia aniversariu ne’e, Presidenti Fundasaun entrega mós sertifikadu ba professores por meritu na’in (10) iha UNITAL, inlkui premiu ba manan na’in sira ne’ebé tuir konmpetisaun diskursus publiku ho lian portugues, sertame, dansa kultura, kompetisaun músika, no atividades sira seluk.
Jornalista : Edison Fernandes
Editora : Revelina Rangel
Leave a Reply